រាជធានីភ្នំពេញ ៖ ថ្វីដ្បិតតែធ្លាប់ផ្ដួលកីឡាករ ចៅ ផលឌឿ ឱ្យអាម៉ាស់ម្ដងកាលពីថ្ងៃទី០៣ ខែមីនា កន្លងទៅ ប៉ុន្តែ កីឡាករ នន់ ជំនិត ហាក់មិនមានជំនឿចិត្តទាំងស្រុងប៉ុន្មានឡើយ នៅពេលសួរថា ការប្រកួតលើកទី២ រវាងពួកគេ ដែលនឹងប្រព្រឹត្តិឡើងនៅថ្ងៃអាទិត្យ ទី០៤ សីហា ខាងមុខ ។ នៅពេលសួរថា តើ នន់ ជំនិត អាចផ្ដួល ចៅ ផលឌឿ ម្ដងទៀតបានឬមិនបាន? នន់ ជំនិត អះអាងថា ការប៉ះគ្នាលើកនេះ ទំនងត្រូវស្ទុះស្ទារបន្តិចហើយ ដោយមិនអាចគ្រាន់តែសម្ដែងការតាំងចិត្ត ហើយលេចចេញលទ្ធផលកើតឡើង បន្ទាប់ពីបានប៉ះគ្នាជាមួយ ចៅ ផលឌឿ កាលពីលើកទី១ ហើយពិបាកស៊ីក្នុងគ្រានោះ ។
ជើងខ្លាំងប្រចាំក្លិបកំចាត់មីន នន់ ជំនិត បានបញ្ជាក់ប្រាប់ថា ខ្លួនមិនបានប្រឹងប្រែងហ្វឹកហាត់លើសពីការឡើងរេញកាលពីលើកមុនៗ ប៉ុន្មានទេ សម្រាប់ជំនួបជាមួយ ចៅ ផលឌឿ មកពីក្លិបសំរោងកោងខេត្តបាត់ដំបង នៅបឹងស្នោរ ខាងមុខនេះ ខណៈដែលការប្រកួតនោះ មិនមែនជាការប្រកួតអន្តរជាតិ ដែលតម្រូវឲ្យគេផ្ដោតការប្រឹងប្រែងខុសប្លែកផង ទើបរឹតតែធ្វើឲ្យគេមិនត្រៀមខ្លួនលើសគ្រាមុនៗ ។ ភាពស្ទាក់ស្ទើរនេះ ត្រូវគេឃើញកើតឡើងបន្ទាប់ពីឮ ចៅ ផលឌឿ អះអាងយ៉ាងមុតមាំថា នឹងសងសឹកឲ្យខានតែបានក្នុងជំនួបលើកទី២ ។
ចៅ ផលឌឿ បាននិយាយថា គេមិនដែលស្ងប់ចិត្តនោះទេ នៅពេលរំលឹកដល់ការប្រកួតដែលលោកបានប៉ះគ្នាជាមួយ នន់ ជំនិត ហើយទទួលបានលទ្ធផលចាញ់យ៉ាងអាម៉ាស់កាលពីលើកទី១ ។ ផលឌឿ បានប្រាប់ថា តាំងពីមុនផ្គូផ្គងលើកទី២នេះ គេនឹងពុះពារឲ្យខានតែបាន ដើម្បីកែប្រែលទ្ធផលដែលធ្លាប់រងការអាម៉ាស់ក្រោមដៃ នន់ ជំនិត បើទោះជា ជំនិត ជាជើងចាស់ ហើយមានសមត្ថភាពខ្ពស់ជាងក៏ដោយ ។
នន់ ជំនិត អន់កម្លាំងស៊ុហ្វ ប៉ុន្តែ បើនិយាយពីកណ្ដាប់ដៃ ទាត់ និងជង្គង់ គឺគេនៅខ្លាំង ហើយភាគច្រើនបើគេវាត់ដៃ ឬបោះជើងទៅហើយ គឺប្រាកដណាស់ថា នឹងមានអ្នកគេចមិនរួច ។ វិធីតែមួយគត់ដែល ចៅ ផលឌឿ អាចសងសឹកបាន គឺលុះត្រាតែគេប្រឹងទប់ នន់ ជំនិត ឲ្យដល់ទឹកទី៣ ហើយចាំវាយសម្រុកនៅពេល នន់ ជំនិត ចុះខ្សោយថាមពល ។ ចៅ ផលឌឿ ត្រូវព្យាយាមទប់កណ្ដាប់ដៃរបស់ នន់ ជំនិត ឲ្យបានដាច់ខាត ព្រោះតាមបទពិសោធន៍ប្រកួត នន់ ជំនិត មានសមត្ថភាពប្រើកណ្ដាប់ដៃបានរហ័សណាស់ ដែលគ្រប់ការវាយចេញ គឺដៃគូទាល់តែដឹងខ្យល់ទើបគេចផុត ។
យ៉ាងណាមិញ កីឡាករ ចៅ ផលឌឿ ក៏មានផ្លែដៃល្អ និងផ្លែជើងច្បាស់ ជាចំណុចដែលអាចទប់នឹង នន់ ជំនិត ផងដែរ ដ្បិតតែ ចៅ ផលឌឿ មានទម្លាប់ប្រើកម្លាំងបាយដោយគំហ៊ុកជាងការវាយចេញដោយបច្ចេកទេស ប៉ុន្តែ នន់ ជំនិត ក៏ទំនងជាយ៉ាប់ដូចគ្នា បើ ចៅ ផលឌឿ វាយចេញដោយកម្លាំងបាយដោយមិនខ្លាចញញើត ។
ទំនងជាហេតុផលទាំងប៉ុន្មាននេះ ទើបបង្ខំឲ្យ នន់ ជំនិត ខ្វះជំនឿចិត្តចំពោះការបំបាក់ ចៅ ផលឌឿ លើកទី២ ប៉ុន្តែ ក្រុមអ្នកតាមដានក៏មិនហ៊ានសន្និដ្ឋានថា ចៅ ផលឌឿ អាចឈ្នះ នន់ ជំនិត ក្នុងជំនួបនោះដែរ បើទោះជាគេបានតាំងចិត្តជាស្រេចថា ត្រូវតែធ្វើឲ្យ នន់ ជំនិត បាក់មុខ ។ ក្រុមអ្នកឃ្លាំមើល បានត្រឹមតែរំពឹងថា គូប្រកួតទាំងពីរនឹងវាយគ្នាដោយអស់សមត្ថភាពក្នុងករណី ដែលគ្មានភាគីណាមួយធ្វើចាញ់ ដើម្បីប្រាក់តែប៉ុណ្ណោះ ។
លើរេញនោះដែរ កីឡាករ ចាន់ សុខហួន អ្នកប្រដាល់ក្លិបនិរោធមានជ័យ នឹងឡើងសងសឹកជាមួយកីឡាករ សឹង្ហ សាវ៉ន អ្នកប្រដាល់ក្លិបសឹង្ហៈកីឡា កីឡាករ ម៉ន វិចិត្រ មកពីក្លិបព្រែកឯងកីឡា ត្រូវប្រកួតជាមួយ សោម តឿទី មកពីក្លិបខ្លារខិនមានរិទ្ធ និងកីឡាករ ឯម សុខបាន ជើងថ្មីមកពីក្លិបឫទ្ធីពោធិ៍សែនជ័យ ត្រូវប្រកួតជាមួយកីឡាករ ផាន់ សារ៉ែម មកពីក្លិបគុជសាកីឡា ៕ប្រភពមកពី៖
0 comments:
Post a Comment